Von oole Tieden

Bi de Oolwarder Kirch hebbt wi een Kirchenschipp vun 1831 in neoklassizistische Aart. De Tuurn is eerst 1895 dortokamen. Dat he so hooch is (62 m), liggt dor an, dat de Lüüd vun Neehoff, de to de Gemeende togeheuern dään, verlangt hebbt, he müß vun dor achtern Diek to sehn ween, anders dään se nix dorto bistüüern.

Wo een op achten schull:

  • De Kanzel öber den Altaar. De warrd ober blots bruukt, wenn de Kirch ünnen un baben vull is (ca. 600 Plätze)
  • De ole Dööp
  • De Klock in den Kirchtuurn, is 1895 för 2000 Goldmark stift un ward hüüt noch jede Woch vun Hand optrocken
  • De Gedenktafeln för de Gefallenen in de Weltkriegen
  • De Utstellung vun Fotos ut Oolwarder, as dat freuher weer

In den 2.Weltkrieg harr Oolwarder un ok de Kirch düchdig ünner de Bomben to lieden. De Fleegers, de jemehr Bomben nich öber den Haben un de Oilraffinerien loosworrn weern, hebbt ehre Last denn öber Oolwarder afsmeten. Ok de Kirch hett wat afkregen un kunn eerst 1948 wedder inweiht waren.

1964 geev dat eenen Schwelbrand in de Kirch, bi den de Orgel tweigüng. Siet 1969 hebbt wi eene neede scheune Beckerath-Orgel, de ok in de Boombleuh-Kunzerte erklingen deit, de siet 1971 jedeen Freuhjahr stattfinnen doot.

Un doch harr de Hamborger Senaat al 1961 in dat „HafenerweiterungsGesetz“ besloten, dat Dörp optogeben. Nah de Surmfloot vun 1962 ist twaars veel wedder opbuut. Man vun 1973 -1978 sünd de mehrsten Grundstück un Hüüs, ok de Kirch, vun de Stadt opköfft, un de Lüüd müssen ehr Dörp verlaten. Denn hett dat jahrelang brach legen, bet de neede Container-Terminal-Altenwerder in Bedrief güng.

De Kirch kunnen wi erholen, de steiht ünner Denkmalschutz. Un de Thomasgemeende Huusbrook un de Hamborger Port Authority kümmert sik dor um, dat se as Wahrteken vun de Autobahn un in den Haben wiederhen to sehn is un dat dor ok in Tokunft noch Kirch un Kultur stattfinnen deit.